أقسام المكتبة الادبية
 قصيدة مختارة:
 البحث في المكتبة الأدبية:
 احصائيات المكتبة الأدبية:
 الشعر الشعبي

المقالات بالطف لو جنت موجود

القسم القسم: الشعر الشعبي الشخص الكاتب: السيد سعيد الصافي تاريخ الإضافة تاريخ الإضافة: ٢٠١٣/٠٦/١٠ المشاهدات المشاهدات: ٣٨٠٦ التعليقات التعليقات: ٠

بالطف لوجنت موجود

السيد سعيد الصافي

بالطف لوجنت موجود
تلقى الغايب الموعود

 

يوم العاشر بعاشور
يم حسين جده يزور

 

كل عام بمثل هاليوم لجده يعتني لقبره
ويوقف بالمكان البيه بالسيف انقطع نحره
يلطم ويه زواره ويبجي ويسجب العبره
لمصاب الغريب ينوح
وينادي بقلب مجروح
ويلي عليك يا مذبوح
من مثلك يا بواليمه عطشان الجبد منحور
بالطف لوجنت موجود يوم العاشر بعاشور
تلقى الغايب الموعود يم حسين جده يزور

 

قبرك من بعيد يلوح وتشع بالسما أنواره
قاصد لك يا جدي زاير ويه زواره
بجاهك اندعي الباري اظهر وآخذ بثاره
يحسين وخبر منقول
عن جدنه الرسول يقول
بجاهك كل دعا مقبول
وليك اليعتني بحاجه من عندك يرد مسرور
بالطف لوجنت موجود يوم العاشر بعاشور
تلقى الغايب الموعود يم حسين جده يزور

 

يمك شيعتك يا حسين كل عام اليجي اقصدون
يعرفونك يا بوالسجاد فضل زيارتك مضمون
وآنا اتعنى وياهم ولطم ويه للي لطمون
وآنه ابنه يا بوالسجاد
من عنده اريد مراد
وانته مقصد الوفاد
يا يوم الفرج يا يوم انخاك بقلب مجمور
بالطف لوجنت موجود يوم العاشر بعاشور
تلقى الغايب الموعود يم حسين جده يزور

 

عندي ويه العدا ثارات موبس واحد لمطلوب
نحرك خنصرك جبدك شيبك بالدما مخضوب
صدرك قلبك العطشان جسمك سيد المسلوب
قبلك ما حصل مفجوع
نحره من القفا مقطوع
وراسه على الرمح مرفوع
ومن ديرة لعد ديرة راسك يا بواليمة يدور
بالطف لوجنت موجود يوم العاشر بعاشور
تلقى الغايب الموعود يم حسين جده يزور

 

من امصيبته شنسى جم حالة تشيب الراس
انسى ظهرك المسكور من طاح القمر عباس
انسى زينب الظلت فرجة بين كل الناس
انسى خيام متوجرة
انسى عيال متيسرة
انسى اجساد على الغبرة
لوانسى طفل مذبوح بعده بعمر ست شهور
بالطف لوجنت موجود يوم العاشر بعاشور
تلقى الغايب الموعود يم حسين جده يزور

 

لمن انشد العدوان شتقدم عذر شتقول
ظل بلا دفن مطروح قبل حسين يا مجتول
وليش مسلبه ثيابه والخيل على صدره تجول
ظامي ينازع الوحده
وقطعة من الجمر جبده
جان هذا الجزى لجده
لوقلكم عزيز حسين بدمه بيا ذنب مهدور
بالطف لوجنت موجود يوم العاشر بعاشور
تلقى الغايب الموعود يم حسين جده يزور

التقييم التقييم:
  ٠ / ٠.٠
 التعليقات
لا توجد تعليقات.

الإسم: *
الدولة:
البريد الإلكتروني:
النص: *

 

Specialized Studies Foundation of Imam Al-Mahdi (A-S) © 2016