يغايب رجع كل غايب

يغايب رجع كل غايب

دمعة زينب إتناديك

وأسألك ليش ما ترجع

وإنت إتشوفها وتسمع

يغايب هاي زينب هاي ما تخفاك حالتها
أسيره إمخدرة حيدر والعدوان شافتها
مهضومه وتدير العين غريبه وراحوا إخوتها

ما واحد حضر يمها

يغايب وشكبر همها

إسأل وين إبن أمها

ذاك إعله الرمح راسه

وجسمه ابكربله إمقطع

غريبه وتحرس الأيتام والون اليتامه إتون
تشوف الفاجده الشبان تشوف أم الرضيع إتحن
بالهم النهار إيروح وآه يا الليل من يجن

هذا اليفز من نومه

وهاي التبجي مهضومه

ذاك الروحه مالومه

وزينب بين هذا وذاك

تفتر والحزن يتبع

زينب تدخل الديوان منهو الجان حاسبها
بس غدر الزمن معروف وإسأل بيش يطلبها
يغايب تقبل إبن إزياد يقرب ليها ويسبها

هاي الأبد ما صارت

ولا جانت ولا دارت

يغايب زينب إحتارت

هاي أم الخدر يا حيف

عليها الناس تتجمع

يغايب ما تسل سيفك دخيلك طول إغيابك
سهم الصاب جبد حسين ادري ابجبدتك صابك
يمهدينه إلك جم ثار يمته يبدء إحسابك

زينب تنتظر تبدي

وإتقلك يحادي إحدي

أظل برجاك يالمهدي

احشمك وإنت أبو الغيره

يمهدي ليش ما تفزع

من كسر الضلع تبدي لو تبديها من الطف
إخذ دم الرضيع وصيح خل ماي النهر ينشف
عندك عالنهر جفين وخنصر ضايع من الجف

ثارك إطلب إبثارك

وخلي إنشوف بتارك

ناري تنطفي ونارك

تطيب إجروحي من تظهر

ولا جفني بعد يدمع