اَللّـهُمَّ كُنْ لِوَلِيِّكَ الْحُجَّةِ بْنِ الْحَسَنِ صَلَواتُكَ عَلَيْهِ وَعَلى آبائِه في هذِهِ السَّاعَةِ وَفي كُلِّ ساعَة وَلِيّاً وَحافِظاً وَقائِداً وَناصِراً وَدَليلاً وَعَيْنا حَتّى تُسْكِنَهُ اَرْضَكَ طَوْعاً وَتُمَتِّعَهُ فيها طَويلاً

الشعر الشعبي

جيتك واسمع شكواي

جيتك واسمع شكواي

حيدر تركي الكربلائي

جيتك واسمع شكواي		ياخويه من اعداي
خويه خويه ياخويه من اعداي

أنه زينب اجيت اليوم واسمعني من حقك اذا انته متعرفني متغيره السبي يالوالي غيرني المصايب من بعدد عينك تولتني
أنظر گوم البلواي		ياخويه من اعداي
خويه خويه ياخويه من اعداي

آنه زينب آنه البالهيبه معروفه خيالي چان محد يگدر ايشوفه اطب مسبيه هسه الديرة الكوفه وبالاحبال وسفه والله مچتوفه
بيه جارت دنياي		ياخويه من اعداي
خويه خويه ياخويه من اعداي

يفرسان الوغه معروفه صولتكم أنه زينب يبو الغيره عزيزتكم اروح اميسره ماترضه غيرتكم بس ياحيف هالحلت منيتكم
ردتك ماردت الماي		ياخويه من اعداي
خويه خويه ياخويه من اعداي

نخيتك ياگمر ردتك تجي ليه وتشوف اشصار بعدك يالولي اعليه ماترضه الشمر خويه يجر بيه وللشامات امشي انه مسبيه
تايه عگلي والراي		ياخويه من اعداي
خويه خويه ياخويه من اعداي

مواقف بيه مرت ليك اصورهه تفت والله الصخر من إنه اذكرهه الخرابه البيهه عشنه لو تشاهدهه ما اعرف ألك بيمن اشبهه
بيهه الألام اهواي		ياخويه من اعداي
خويه خويه ياخويه من اعداي

اجيت امحمله بآهات ممشانه اسولفلك يخويه اشسوت اعدانه الشمر بالسوط بعدك والله اذانه تمنيت الگمر نايته ويانه
وتشاهد انته اسباي		ياخويه من اعداي
خويه خويه ياخويه من اعداي

اليزيد الطاغي دخلونه بدواوينه يستهزء يخويه من يحاچينه يگلي حسين والعباس چا وينه تمنيتك يبو الغيره تجي لينه
ظلت تدمع عيناي		ياخويه من اعداي
خويه خويه ياخويه من اعداي

مكفوله طلعت اوياك من داري وراح ارجع كفيله والدمع جاري شجاوب للذي ايناشد عن اسفاري امن ايسألون عنكم تستعر ناري
ردتك ترجع وياي		ياخويه من اعداي
خويه خويه ياخويه من اعداي

الشعر الشعبي

تاريخ الإنشاء: ٢٠١٨/٠٤/٣٠

المشاهدات: ٢.٢ K

التعليقات: ٠

الكاتب: حيدر تركي الكربلائي

النشر:

التعليقات:

لا توجد تعليقات.