الزهراء في الأربعين

طرّيت ( شگيت) الگبر يبني او تعنّيت

او على ذكرى اربعينك يالولد جيت

على ذكرى اربعينك أمّك اتعود

او تجيك الكربله او من ترجع اردود

تگرّح عينها او تخْمش بلخدود

او تصيح ابْدالك آنه ميْته يا ريت

او على ذكرى اربعينك يالولد جيت

تشيل اترابك او عالراس تِحْثيه

او نوب اعلى الضلع گامت تخليه

بلچي ايطيّب اصوابه او يداويه

او نوب اتْكلمّك يالبيه تِواريت

او على ذكرى اربعينك يالولد جيت

تنادي او تنتحب و اتنوح كترك

تِجيم الماتم او تنعه اعلى گبرك

أمّك فاطمه لمّن تحِظرك

تگِلك عالوَعِد يوْليدي ردّيت

او على ذكرى اربعينك يالولد جيت

ردّيت اعلى گبْرك يا شفيّه

او گصدي ابردّتي للغاضريّه

انْتلگه زينب الردّت سبيّه

او گُرَب منّك ظعنها إن چان مدْريت

او على ذكرى اربعينك يالولد جيت

آنه اوياك نتْلگه الظعينه

او ناخذ بيد " زينبنا " الحزينه

او نِرد كلنا سوى لأرض المدينه

هاذي غايتي يبْني او تمنّيت

او على ذكرى اربعينك يالولد جيت

 گوم ابْهمتّك ظعْن الحرم رد

او حِط إيدك على امتوني او تِسنّد

خلينا ابْيتاماك انتفگّد

او نسأل عن رقيّه شمعة البيت

او على ذكرى اربعينك يالولد جيت

او نسأل عن عِليلك شلْمِچيده

او نِنزله امن الجمّل و انفكله گيده

او نسأل عن خبر سِكنه او حميده

تراني اعلى اليتامى يبْني حنّيت

او على ذكرى اربعينك يالولد جيت

گوم او جِيب طفلك چان تگدر

هاي أم الطفل منها اللبن در

او هاي أم جاسم او هاي أم لكْبر

مثلي اعليك ونّن حين ونّيت

او على ذكرى اربعينك يالولد جيت