عفتك أيام كل يوم ابعام

عـفـتـك أيــام

كــل يــوم ابــعــام

گوم وشوف امصابك أصعب لو هضم الشام

أنا زينب واجيت امن اليسر يمك

يمن طاح وتوذر عل الأرض جسمك

مثل دم راس حيدر ظل يصب دمك

واضلوعك تهشمت مثل ضلع أمك

أريد أذكر إلك هضمي وسهم هضمك

وأنشد يا هو أصعب همي لو همك

وأرسم نارين

بدموع العين

وانشاهد يا نار الأكثر تركت آلام

أبدي من طحت يبن أمي جدامي

أوقعت من ظهر مهرك عل الأرض دامي

لونك كِلت قلبك يسعر وضامي

أنه قلبي استعر من جمرة اخيامي

لون كِلت الحوافر هشمت اعضامي

نفس هالخيل بالطف داست أيتامي

غارات الخيل

ما خلت حيل

نفس الخيل السحكت صدرك سحكت أيتام

يا بعد أمي وأبويه و أغله من عمري

بعد أشرح وأقارن صبرك وصبري

لون جسمك تسلب يا شهم تدري

مثل جسمك يبو اليمه انسلب خدري

ولونك كلت دمي ايسيل من نحري

مثل دمك دمعتي اويَ الدمه تجري

دمعي المسجوم

ظل يجري ادموم

واجروح اعيوني اتظل تنزف ما ظن تلتام

من يمك رحت لليسر مغصوبه

خذت خدر تحن وأطفال مرعوبه

عفت بالطف جثث يبن أمي مسلوبه

وبدم النحور التجري مخضوبه

إذا عذرك جبدتك سهم مصيوبه

تراني امن الشماته اسهام مضروبه

واشقف رميات

عين الشمات

مو سهم الواحد صابتني صابتني اسهام

اشكثر يا خويه قلبي امصايب اتحمل

وأظن من همي همك أهون وأسهل

انت المتت بالعز ما ردت تنذل

وأنه المسبيه أختك رحت عالهزل

ابحجر صابوك يا ريحانة المرسل

وانه راسي ضربته ابجبهة المحمل

راسي المصيوب

مثلك مخضوب

مجموعه اجروحك واجروحي قلبي المنضام

يمن عفتك رميه اعله الترب وحدك

طول الدرب أمشي والفكر عندك

أفكر بيك منهو اللي حفر لحدك

ومنهو البيده جر السهم من جبدك

ابها الحاله أفكر صرت من بعدك

فوق اليسر محتاره بهضم فقدك

محتاره اهناك

ما بين اعداك

يحسين وعقبك وقفوني ابمجلس ظلام

من عندك يخويه القوم حرموني

عله انياق الهزل يحسين مشوني

من مجلس لعد مجلس يودوني

اشكثر عقبك مرار و محن راوني

ارجعت يمك يخويه وناخت اضعوني

وعله قبرك طحت والدمعه بعيوني

يم قبرك جيت

صحت وناديت

أيام الفارقتك بيهن جنهن أعوام