اَللّـهُمَّ كُنْ لِوَلِيِّكَ الْحُجَّةِ بْنِ الْحَسَنِ صَلَواتُكَ عَلَيْهِ وَعَلى آبائِه في هذِهِ السَّاعَةِ وَفي كُلِّ ساعَة وَلِيّاً وَحافِظاً وَقائِداً وَناصِراً وَدَليلاً وَعَيْنا حَتّى تُسْكِنَهُ اَرْضَكَ طَوْعاً وَتُمَتِّعَهُ فيها طَويلاً

الشعر الشعبي

احنه شيعة الحسين

احنه شيعة الحسين

السيد زكي الياسري

احنه شيعة الحُسين كربله و أحزانها		جينه نحيي الاربعين والفخر عنوانها
احنه شيعة الحُسين

جينه نحمل علجتاف هموم والآم السنين جينه ونريد الفرج منك يلاه العالمين نقسم اعليك بضلع فاطمه بت طه الامين عجِّل اظهور الامام الياخذ بثار الحسين
عجِّل اظهور الامام جينه والحادي الدمع		حته ننعم بالسلام نقسم بحق الضلع
احنه شيعة الحسين

بالصفات الضاهريه الناس مختلفه الصور كل شخص يحمل صفات اتميزه عن باقي البشر واحنه من دون الخلايق شلنه عنوان الفخر حيث يجمعنه الحسين شما يفرقنه الدهر
وي ابو اليمه الشهيد شما قسه اويانه الزمن		هذا منهجنه السديد يبقه لحسين الوطن
احنه شيعة الحُسين

احنه قاموس الكرامه من عطانه رفعته احنه مشعل كل فضيله من هُدانه جذوته احنه كل ثائر اتعلم من دمانه ثورته وكل فدائي و كل مناضل احنه سيف بيمنته
احنه عبَّدنه الطريق احنه اهل الغانمه		احنه حبل الله الوثيق والسيوف الصارمه
احنه شيعة الحُسين

احنه صرخة رفض تدوي ابسمِع كل ضالم رعد احنه سدّ الكل يزيد ابحال امتنه استبد احنه مصداق الخلود الچان من زينب وعد قسم نقسم مانموت وعِدنه من حيدر مدد
احنه اولادك علي احنه ميهمنه اليكَول		بينه كل هم ينجلي بدعه حب ال الرسول
احنه شيعة الحُسين

ويّه كل گطره ابدمانه يسري حب آل النبي احنه غير احسين ابداً ما نريد وما نبي احنه ما قرّينه ابداً بالولا للأجنبي احنه ما بعنه العقيده (في سبيلِ المطلبِ)
اسأل اعلينه الطغاة بيمن اتجله الخلود		منهو باقي بالحياة منهو مصداق الصمود
احنه شيعة الحُسين

احنه بركان القيَمْ خالد على مر الدهور سر بقاء الدين دمنه والبجي ولطم الصدور حب ابو السجاد بينه جوهري.. بال لا شعور يعني وي طينتنه جان بمبتدأ فطرتنه نور
احنه فرسان الولاء نِحسهه وي دكَ النبض		وبدمانه كربلاء كل دقيقه تنتفض
احنه شيعة الحُسين

الشعر الشعبي

تاريخ الإنشاء: ٢٠١٨/٠٢/٢٨

المشاهدات: ٢.٤ K

التعليقات: ٠

الكاتب: السيد زكي الياسري النجفي

النشر:

التعليقات:

لا توجد تعليقات.