أذّن أذان الأربعين

حَيَّ عَلى مزاره

حانت صلاة الزائرين

قد قامت الزياره

أذّن أذان الأربعين

الله أكبر كبَّر ابگلب المُحب صوت النبُض
واجب نلبّي دعْوِته وابكربله انأدي الفرُض
واعله الوعد شفنه البشر تطوي الدرب طول ابعرُض
هذا اليجي ابْطَيْ السِّمَه اْو ذاك اليجي اِبْطيِّ الأرض!

من شدِّة انشغافه

شد عزمه من أم البنين

ما همِّته المَسافه

أذَّن أذان الأربعين

مو رايه بيْميني شلِت هذا الگلب بيدي يِرِف
يالجنِّتَك فوگ العقِل فوگ الشِّعِر فوگ الوَصِف
او لنَّك عزيز الله اْو صرت عد ربنه جاهك مُختلف
لو مات واحد بالدرب يخلقلك ابداله ألِف!

إِسْمَحلي أرْد أنِشدَك

والـ عِنْد ذِي العَرْشِ مَكِينْ

ألله اشكثر يودَّك؟!

أذَّن أذان الأربعين

الخلّوْا مواكب بالدرب خدّام نحسبهم نعم
والواقع اهمه السَّاده والأملاك بخْيَمهم خدَم
نصبوْا غرف جنّة عدَن لا تعتقد نصبوْا خيَم
وزّعوْا كوثر للشرب واعله الشمِس دگّوْا علَم

ابعين البصيره ناظر

ويَّاهم الرّوح الأمينْ

كلشي التريده حاظر

أذّن أذان الأربعين

يا زاير احسين ابتشر وابهاذي ربنه البشَّرَك
فضْل الزِّياره منحفظ ذخر او ذخيره المَحْشَرَك
او ياللي تحظره ابكربله باچر يجيك او يحْظرَك
او يوم القيامه اعله الصِّراط ابنفسه هوّه ايْعبُّرَك

احسين الذي يِريده

(هذا جزاءُ المُحسنين)

للجنَّه يلزِم إيده

أذّن أذان الأربعين

لو تنكشف لك عن حقيقة كربله اتشوف العَجب
اتشوف الرُّسُل لزموْا سِره اْو صفَّ اعله إيوان الذهب
لو نفرض ابدرب المشي نتعب نعم يسوه التعب
يكفيني من اِزيارته اِسْمي ابدفتر الزهره انكتب!

صكِّ النجا بديَّه

گلبي عله مرِّ السنين

واتوقِّعه الزچيَّه

أذّن أذان الأربعين