بالأربعينيه جينه فدائيه

بالأربعينيه

جينه فدائيه

مثل الأمواج الكربله طلعت مواكبنه
والصيحه وحده يا علي وينه اليحاربنه
كل إحنه عابس والعشگ فارس إبمذهبنه
ننزع الأرواح ونجي لو ردت تطلبنه

صرخه حسينية

جينه فدائيه

لجلك سحگنه إعله الخطر والمهدي ويانه
نقسم ابزينب ما يردنه إبن مرجانه
منحرنه إعله الشمر يا شمر هاذانه
ننتصر لمن ننذبح وحسين مولانه

صحنه إبصدق نيه

جينه فدائيه

هاك العهد يبن العهد من إگلوب زوارك
برواحنه إنوفي مثلما وفت أنصارك
جمره ووسط گلب المحب ما تنطفي نارك
حته لون راعي الأمر گام وأخذ ثارك

دمعتنه مجريه

جينه فدائيه

خله يفجرنه الذي حاربنه تكفيره
شيعة علي إوداعة علي ميهزنه تفجيره
طبينه ساحة كربله والعالم إبحيره
وويانه گام إبرايته عباس أبو الغيره

بالوفه إيشع ضيه

جينه فدائيه

لو سال دمنه إعله الأرض بيه نكتب إحروفك
يحسين لو صرنه وذر تجمعنه بچفوفك
من فجرونه الناصبه كل ظنهم إنعوفك
وإستغربوا من شاهدوا أشلاءنا إتطوفك

وبحضرتك هيه

جينه فدائيه

خلينه خصمك منذهل وإمدوهن وحاير
يمنعنه عنك ما گدر بالماضي والحاضر
ذوله إحنه زوارك نحن حنت گلب جابر
هنياله كلمن ينكتب في دفترك زاير

حاجتنه مگضيه

جينه فدائيه