اشعدها زينب عودت لحسينها

اشعدها زينب عودت لحسينها

باليسر وفّت البينه وبينها

اشعدها زينب ويه الحسين شتريد

ما كفاها مصابها وشوفه يزيد

نست هظم اليسر لو وحشة البيد

لو برض كربله اشنظرت عينها

باليسر وفّت البينه وبينها

اشعدها زينب ردت لكربله ردود

ما درت بخوتها متوسده اللحود

الراح منها راح لتضنه يعود

وعالمصايب بس صبرها ايعينها

باليسر وفّت البينه وبينها

اشعدها زينب عودت لرض الطفوف

ما درت لو وصلت الطف شتشوف

انچان ما تگطع املها وما تعوف

خل تگضي اعله اگبور سنينها

باليسر وفّت البينه وبينها

اشعدها زينب عتب لو رايده تنوح

واليسر ما خله الها بعد روح

خل تلم الحرم والطيبه تروح

ويم گبر امها تكثر ونينها

باليسر وفّت البينه وبينها

اشعدها زينب تعدي ما بين الگبور

وابمچان خيامها ظلت تدور

بالشكايه وبالمعاتب لا تجور

حسين شاهد حرگة صواوينها

باليسر وفّت البينه وبينها

اشعدها زينب امل بعد اشتنتظر

شاهدت مصرع اخوتها واليسر

والتحشم بيه منها يعتذر

تدري لا رايته ولا چفينها

باليسر وفّت البينه وبينها

اشعدها زينت حايمه اعله المشرعه

وغدت تتمثل اخوها ومصرعه

ما درت بچفوف اخوها امگطعه

وجثته بفيض الدمه مغسلينها

باليسر وفّت البينه وبينها

اشعدها زينب تذكر ايام الدلال

ما درت بخوتها متوسده الرمال

خل توزم روحها ابجمع العيال

حيث بمر العايله اموصينها

باليسر وفّت البينه وبينها

اشعدها زينب والعليها ادته

الراده منها حسين عگبه سوته

حفظت العايله ونصرت ثورته

وسبت بالشام الذي سابينها

باليسر وفّت البينه وبينها

اشعدها زينب واليريده حسين صار

وضع اميه منها صابه الانهيار

خل ترد عيال اخوها للديار

العتب وين وروح زينب وينها

باليسر وفّت البينه وبينها