باليسر زينب عالحرم ظلها

باليسر زينب عالحرم ظلها

وتصيح هذي كربله چا وين أهلنه

ردت بالعيال وبروس أهلها

بحامي الضعينه من يدلينه

فرفرت عالضعن روحي من وصل للغاضريه
ريت ماي العمى بعيني ولا تشوف الفاطميه
بكل گلب جمرة أحزان وكل ظلع حدره شجيه

شحال التروح ميسّره

وماتظل بعدي مخدره

وتظل غريبه محيّره

واتحوّفها المنيه

من اسمع بزينب لاچن يهالناس

من اليسر ردت تلطم على الراس

وتصيح إجينه من اليسر وين الكفلنه

هالله هالله شلون وگفه وگفت بدار المخيم
وصدت بعين المصيبه وشاهدت خدر التهدم
وچنها تتصور النار خيمه عالخيمه اتلايم

صاحت ومدمعها سجم

بيادار أنزل هالحرم

چاوين حراس الخيم
وين البخدري توزم

دار الخيم هاي چانت زهيه

شو مظلمه اليوم ياهل الحميه

ما تغمض عيون الحرم موحش نزلنه

شلون لو جت گلب صارت بين الگبور ومحنّه
هاي التنادي يالأكبر يا شباب والماتهنه
وذيج تصرخ آ ياجاسم معرس وبالدم تحنه

وهاي التدور عالطفل

تصيح والمدمع يهل

عطشان إبني تنچتل
والشرب محروم منه

گوس الذي صاب نحرك رماني

وبناظري طاح سهمه وعماني

ظليت انوحن وانتحب واجذب الونه

حضنت گبر حسين زينب وتلثم ترابه وتشمه
خويه خليتك رميه وجسمك مغسل بدمه
مگطع بحد النواضي وحرت بيه شلون ألمه

فجرنه صواب الحجر

چتفنه بحبال الدهر

وسهم المثلث بالأثر
مرد لب حشاك سمه

من عگب عيناك ما نمت ليلي

والكوفه والشام هدمت حيلي

وراسك على راس الرمح يبره الضعينه

چني بزينب تنادي يا ربات الخدر گومن
وياي نمشي للشريعه ويم گبر عباس حومن
وحچن الصاير علينه لا تعتبن لا تلومن

عباس ما يحمل عتب

من گطع الچفوف السبب

يسرونه والعز انسلب
وبضعيف الصوت حنن

عالشاطي عفناه غصبن علينه

ونخبره بالصار من عگب عينه

چي ما حضرنه نودعه ونعتذر منه

يالطحت من عتب سكنه وگطعت جسمك الغيره
بطيحتك دهري سباني وأچفي ديره واطب ديره
صابني سهم البعينك ويبّس بگلبي نميره

الله ياصواب العمد

صوبني والعز إنفگد

لا ظل أخو ولا ظل ولد
ولا عمام ولا عشيره

من عگب عيناك دهري ولاني

ياخويه ظليت آنه وزماني

ولا ظل حميم ولا حمه البيه إنتچلنه