رش يا دمع العين عالوجنات رش

رش يا دمع العين عالوجنات رش

لو وصلنه العلگمي يا جفي مش

يا دمع دليني بالله اعله النهر
واجري لمن نوصل الگبر الگمر
گله يا عباس إجينه امن السفر
چالمناجل يا دمع لرموشي حش

أرد أگله ارجعنه من ديرة الشام
حرم مذعورات ويايه وايتام
عالگبر أهون مثل سرب الحمام
وروحي إلهن يا گمر عدنان عش

غايبه من يوم عفتك عالترب
رحت عنك وآنه مسبيه ابغرب
ارجعت واعله الگبر طشيت الگلب
وگلت له يا چفي بعد للقلب طش

فوگ گبرك يا گمر هاشم طحت
ومثل نوح النوگ عالشاطي نحت
من شفت سهم الحزن أقبل صحت
دش يسهم البين وسط الروح دش

أرد أخبرك والهرش گلبي لووه
راح أبو السجاد عگبك يا إخوه
عگب وجهك شفت بالكوفه اوجوه
گوم ذله ورافعه راية الغش

اوگفت بالمجلس ابلوعات وألم
وگلبي يتلاهب مثل نار الخيم
بالمناحه ارتفعت أصوات الحرم
واليتامه ابين دمعه وبين إش

سكتوا كل طفله لو رادت تحن
منعوا اعله العايله حته الحزن
وعاليتامه ايحوم غربان الظغن
وگلت له كش يا صبر هالغربان كش

اطلعنه من الكوفه بالعز والإبه
حرم مو چنها حرم متغربه
إجبال چنه وراسخه اعله النايبه
والصبوره اتگله للمذعور هش

اوصلت للشام ابگلب مثل الصخر
من صبر گلبك يبو فاضل صبر
ابعينك المطفيه وجهت النظر
عله ايزيد وگلت له وش لبليس وش