امن اليسر ردينه اليوم

امن اليسر ردينه اليوم

والروس رديناها

وهاي الحرم رجعت ابمدمع مسفوح
كل وحده گعدت يم گبر والي اتنوح
زينب تصيح ابگلب دامي ومجروح
يا كربله ابدمع العين وديانچ ارويناها

يا كربله اتعنيت وادموعي اتسيل
واليسر ما خله لي مهجه ولا حيل
ليش الجسوم اندفنت ابلا تغسيل
لو ندري چان الأجساد بالدمع غسلناها

يا كربله ونيران گلبي تسعر
دليني وين اندفن جسم الأكبر
عفناه مرمي اعله الرمال اموذر
وليله ابفگد هذا الشاب بالحزن واسيناها

اشعندچ خبر يا كربله اتخبريني
عن جاسم العايش خياله ابعيني
دليني گبره ابيا كتر دليني
عريس وبدمع العين لچفوفه حنيناها

جيت ابحزن يا كربله وگلبي ايلوب
دليني مدفون الرضيع ابيا صوب
ضامي انذبح عبد الله نحره اشمطلوب
عالطفل عيناي اتسيل ما ينگطع مجراها

يا كربله ومن الهضم شاب الراس
واليوم اجيت أنشد أخويه العباس
للوطن لو نرجع شجاوب للناس
لو گالوا الاخوه وين شنگول فارگناها