ليلة عيد وأفراح

ليلة عيد وأفراح .. وعطر الشوق الفواح
ينثر شوقة الوردي .. يالمهدي يالمهدي
ليلة عيد وأفراح

شع نور المهدي ابليلة الفرحة بيها غمرتنه
واحنه ابحـفلتـنه انـصـب كـاسـات او نـشـرب خـمـرتـنـه
خـمـرتـنـه امـن الـحـب الـصادق وانكمل سهرتنه
اوما تحله القعدة ابغير اسمك يا شمعة سمرتنه
ياآخر هالانوار .. أبراسي دارت أفكار
أسمع شوف اشعندي .. يالمهدي يالمهدي
ليلة عيد وأفراح

طرت لسامرة اعله احناح اشواقي اوأسـأل عنك
تـحـديني الفـرحـة اويـغمـرني النـور اليظهر منك
مـا شـفـتك مـولـود ابـمهـدك چـنك كوكب چنك
وارموشـك چنـهم طـاووس ابـريـشـه ايلون چفنك
يمك شفته اليوسف .. حاير بيك اشيوصف
وگلك خلص عهدي .. يالمهدي يالمهدي
ليلة عيد وأفراح

يم مهدك قعدت آيات كتاب الله وقرآنه
تنثر أزهار ورشت فوقك ورد بألوانه
حتى الوردة اتقلك من نورك الله سوانه
وهذا العطر التشتمه الوادم من كثر أهوانه
من حبي الهذا النور .. رازقني الباري عطور
بيها اتفرد وحدي .. يالمهدي يالمهدي
ليلة عيد وأفراح

وآنه ابهذا الموقف أتأمل إعجاز الباري
واملاك الدنية اعلى ايميني اتحوم وعلى ايساري
رديت اوياهم خطيت اسمك علقته ابداري
اشتاقيت اوحنيت لحسنك ذاك وشبت ناري
عفتك لحظه وحنيت .. أرجع يمك ياريت
دموعي تجرح خدي .. يالمهدي يالمهدي
ليلة عيد وأفراح

قاعد بالحسرة او اتنطر يوم التنهي اغيابك
واتعود امن الغيبة المرة الحظن اهلك واحبابك
تتكحل عين الشيعة ابشوفة عينك واهدابك
نتبارك بتراب التمشي اعليه وانبوس اترابك
هذا اتراب الجنة .. يالمهدي واتمنة
لو تقبلني جندي .. يالمهدي يالمهدي
ليلة عيد وأفراح