ما أعلم بيا يوم يا ساعة أظهر

ما أعلم بيَا يوم يا سَاعة أظهَر

بيوم الظهور

وبسيفى اخذ ثار دمّك يالاكبَر

أنهَض واثور

انا المِتوَزّم بثَارَك انَا ابْن العَسْكَري المَهدِي
امصابك ياعلي الاكبَر مَخَالِب تِنْهَش بچَبدِي
مِثل مامَصْرَعَك فَجّر مَنابِع من جِفِن جَدّي
تِفجّر مَنهَل عيوني عليك ومابِرَح وَجدِي

چان الحِزن عَطشان وبعيني ينهَل

رَغْم الدّهور

وَيايَة بالاصْلاب حِزنَك تنقّل

انهض واثور

گبل ماينوِلد جِسمي چنت نَجمَة بسِمَا هلالَك
دَعاني البَاري لارض الطَف وشِفِت كِل ماجِرى بحَالَك
مثل عين الغَريب حسين چانت عيني تِبرَالَك
چنت وياه من شافَك صِريع موسّد رمالك

لمّن حُسام الموت چثتَك صِرَعها

بهذا الشعور

عيني وية عين حسين صَبّت دَمِعهَا

انهض واثور

انولِد جِسمي وأحِس وياي انوِلد يالاكبر مصَابَك
وأحس چَن سَاعَة غيابي بِدت من ساعة غيابك
انا الغَايب لَچِن عَايش وانوح لكل رمُح صَابك
وانته الغَايب بگبرَك ثاوي بحفرة اترَابَك

دمّك يعيش وياي كل يوم أشوفه

بصَرخَة غَيور

ثارَك عزيز شلون اسكِت واعوفَه

انهض واثور

وحَگ حُرمَة كتاب الله الصُبَح بين البَشَر مَهجور
وحَگ جَرحَك وحَگ نَحرَك وحَگ دَم راسَك المَطْبور
أحِس يالاكبَر مصَابَك جَمُر بحشَاشِتي مَسجور
الف طَعنة رمُح تِركَت بگلبي مَلحَمة عَاشور

يالاكبر وياليل اگدر انامَه

لسَلب الخدور

وبسمعي دَوية صوت نوح اليتامى

انهض واثور

اخِبْرك يا علي الاكبر خُبر خَلَّى الصَخَر ينحَب
عگب ماسِفكوا دمومَك وجِسْمَك بالدِمَى تخَضّب
جِرَت مِحنَة عگب چَتلَك اشَدّ من مِحنِتَك واصعَب
توذّر جِسم ابوك حسين وسِلبوا عمّتك زينب

منّك يالاكبر جيت انشِد واسَايِل

لهَتْك السِتور

چتلَك اشدّ لو حَال سَلب الارَامل

انهض واثور

مابين النَحب والنوح وبين مسَافَح المَدْمَع
چني ياعلي الاكبر من نَحرَك جَواب اسمَع
تنادي لو الف موتَة اموت وجِسمي يتگطّع
ولا مَصيونة من هاشِم يسِيرَة على الهِزل تِطلَع

مهما تطول اعوام عُمري ومَغيبي

بتالي العصور

لا بُد نَمير الثَار يخمِد لهيبي

انهض واثور