دعاء

ارفعنه ادينه واندعينه

عجّل ابطلعة ولينه

فرد رفعه للسمه ارفعنه الايادي
وابگلب مكسور ظلينه ننادي
يا إلهي ابجاه گُبّة علي الهادي
عجّل اظهور الذي يفني الاعادي

اشگد صبرنه وانتظرنه

انشوفه والسيف ابيمينه

يامجيب اعليك نقسم بالمناره
عجّل الموعودنه ابطلعته وثاره
يمته نسمع صيحته ورنّة فقاره
ووالده وجَدّه تراهم بانتظاره

قَسَم واللهْ لو نظرناه

انحظنه وانقبّل جبينه

والله مشتاگين إله والشوگ هزنه
وسيف هَجره يا الهي اشكثر حَزنه
ابغيبته غير المصايب ماحِرَزنه
غايب وويّاه غايب صار عِزنه

وابظهوره وابحظوره

ترد هيبتنه علينه

ثار ابوه العسكري والهادي جَدّه
اويانه يدعي وللسمه مرفوعه يدّه
ايصيح ياربي الفرج عجّل ابوعده
فاتت اسنين وصدگ طالت المُدّه

وثاره آني ابقيت اتاني

هالبُعد تخلص سنينه

حتى سامره تتانيه وتنطره
بيهه يعلن عالظلم والجور ثوره
ياسميع المهدي ياساعه تظهره
كل أملنه ابهالعمر مَره ننظره

أُمنيتنه ابأدعيتنه

مره وحده يُمُر بينه

لو نشوفه انگله يالمهدي اشعلامك
من خصومك لِسّه ماحان انتقامك
لَوَن تظهر كِلنه نتمدد أمامك

اعلينه مو عالارض مُر وامشي بجدامك

انصير جسرك إحنه بامرك

گول وافعال ابحچينه