نخوة هضم وعتاب يا صاحب الثار

نخوة هضم واعتاب

يا صاحب الثار

يحله العتب وياك يبن الزچيه

ودمع لمعاتب نار من هالرزيه

ومنك يالمهدي انريد اتحل القضيه

وحلها يهون اعليك

 يالتعلم اشصار

تدري بالدنيه اشصار جور ومصايب

من يوم الهادي راح لليوم نوايب

واحنه ابكل شده انصيح وينك يغايب

يمته الفرج يحصل

ظنوة الكرار

نحسب محن وآلام بالجره أدره

گوم الشبت النار وظلت مسعره

وأهل السقيفه اشلون وغدروا الزهره

ومنها الضلع مكسور

صوبها المسمار

ولمن علينه طاح ابوسط محرابه

ومنه الوجه مخضوب من دمه اصوابه

والحسن چبده ذاب وافجعنه امصابه

شيعة علي انذلت

 وذلوها لشرار

وعندك خبر عاشور وشسوت الگوم

وذبحوا رضيع احسين وذبحوا المظلوم

شبوها نار أحقاد مسعوره لليوم

ونفس الظلم والجور

ويحكمنه غدار

چم محنه منها انصيح والعبره انهلها

لوعه وهضم وأحزان ما كو مثلها

للأمه وعدك صار غايب أملها

يالمهدي صبرك طال

 مهجة المختار

قتل وسجن وإرهاب من حاكم ظالم

ذبّح شعبنه اسنين وهجّر الوادم

الشيعي ابغدر ينصاب وانت بيه عالم

وبصحن حامي الجار

 ياوسفه شب نار

ومن هجموا الظلام عالغاضريه

ادموع ودمه صارت بالطف جريه

بلا رحمه ذبحوا ناس وأشراف أبيه

وكربله قصفوها

كعبة الأحرار

طحنه ابشرك عدوان وما إلنه جاره

وبين الظلم والجور صرنه حياره

والأمل بالموعود من ياخذ ثاره

وايرد حگ اللي ضاع

من ايد الكفار

يكفيك الصبر يكفيك يا غيرة الله

دينك ينخاك اليوم ابشده اويه أهله

وشنهو السبب متگوم المشكل تحله

وسيفك ايظل مغمود

 ولا إنته نغار